«Отъ Ерусалима на полуденую страну до Вифлиема 7 верстъ, а в немъ церковъ велика, Рождество Христово, а гдѣ родися Господь нашъ Иисусъ Христосъ, и то мѣсто въ пѣщере под олтаремъ церковнымъ, сойти аки въ погребъ по лѣствицы 7 ступеней; и ясли, гдѣ родися Христосъ, иссечены отъ камѣни мрамора бѣлого. Исъ то пещеры блиско двери въ другую пещеру, и въ той, сказываютъ, Иродъ царь избивалъ младенцы съ матерьми за Христа, и оть матерьнихъ сосецъ млеко течаше на землю; и земля в той пещере мяхка и бѣла. И старцы иерусалимские сказываютъ тое землю: «Млеко пречистые Богородицы». А отъ Ерусалима къ Вифлиому идучи на полудороге стоитъ монастырь святаго пророка Ильи, идеже закла пядесятъ трецъ лъживыхъ. И близъ того монастыря с перестрелъ на дорогѣ мѣсто вообразилося, идеже уснулъ Илья пророкъ, и возгнуся мѣсто, яко воскъ, - знать и до сего дни. И прииде к нему ангелъ Господень и возбуди его и принесе ему опреснокъ пиренъ и корчагу воды. И отъ того мѣста на подромѣ, сиречь въ подолѣ, гробъ Рахилинъ, матере Иосифовы прекрасного, гдѣ проданъ отъ братии своей и веденъ Измалтяномъ и плакася на гробѣ томъ. И на тои же горѣ до Ерусалима, не доходя мѣста Ильи пророка, стоитъ древо маслина и до сего дни зелено; а сказываютъ, егда изыдѣ Богородица не празна въ Вифлиомъ родити Господа нашего Иисуса Христа и отъ руда изнеможе и опочину под темъ древомъ, под маслиною; и то древо по се месту зѣлено; и приходятъ страники и то древо ломаютъ для благословения. Да отъ Ерусалима же на полуденую страну верстъ яко 20 до монастыря великия лавры святаго Савы; церковъ болшая Преображение Господне и иные многие церкви. Келия святаго Савы Освещенаго вытесана въ горѣ камѣной, не велика, какъ человеку сести, а стать в ней нельзя. И в той келии исходитъ исъ потолоку миро мяхко и бѣло, аки ладаная мука; и то миро старцы даютъ вмѣсто мощей для благословения християномъ. А стоитъ тотъ монастырь на краю удоли плачевно, которой пошелъ отъ Иерусалима въ море Содомское; а итти тѣмъ удолемъ плачевнымъ до моря Содомскаго, идеже погуби Господь Содомъ и Гоморъ за бѣзаконие ихъ, пядесятъ верстъ. Изъ моря Содомскаго исходитъ смола черная и сера горячея, аки глыбы, а животного в собѣ море Содомское нечего не имѣетъ, и пить тое воды никому не мочно, потому что та вода всякое животное в собѣ уморяетъ. Море не велико: объходу около его пять дней. И тое смолу емлютъ и мажутъ винограды, на которомъ червь появится, и тою смолою тѣ черви уморяютъ. А серу емлютъ и продаютъ купцемъ, а купцы тою тою серою конопатять корабли, которые ходятъ по Черному морю».